ព័ត៌មាន

ផ្ទះពលរដ្ឋមួយខ្នងក្នុងតំបន់ទឹកលិចនៅខណ្ឌដង្កោត្រូវអគ្គិភ័យឆេះខ្ទេច

2020-10-21 09:35:40

ភ្នំពេញ ៖ ក្នុងអំឡុងពេលទឹកលិចលំនៅឋានបងប្អូនប្រជាពលរដ្ឋក្នុងខណ្ឌដង្កោជាច្រេីនខ្នងនោះ ក៏ស្រាប់តែមានផ្ទះពលរដ្ឋមួយខ្នងធ្វើអំពីឈើប្រក់ស័ង្កសី ត្រូវបានភ្លើងឆាបឆេះអស់ទាំងស្រុងខូចខាតសម្បត្តិទាំងអស់ ដោយសារតែការដុតទៀនបំភ្លឺក្នុងផ្ទះហើយភ្លេចពន្លត់ ។

ហេតុការណ៍គ្រោះអគ្គិភ័យនេះបានកើតឡើងកាលពីវេលាម៉ោងប្រមាណ៥ និង៤០នាទីព្រឹកព្រលឹមថ្ងៃទី១៨ ខែតុលា ឆ្នាំ២០២០ នៅចំណុចម្តុំសណ្តស្ទឹងព្រែកត្នោត ក្នុងភូមិវាលថ្លាន់ សង្កាត់គងនយ ខណ្ឌដង្កោ  រាជធានីភ្នំពេញ  ដែលមានម្ចាស់ផ្ទះឈ្មោះ ព្រឹល ស៊ីដេត ភេទប្រុស ។

សមត្ថកិច្ចបានឲ្យដឹងថា  មូលហេតុដែលបណ្តាលឲ្យភ្លើងឆេះផ្ទះនេះ គឺដោយសារតែម្ចាស់ផ្ទះដុតទៀនហើយភ្លេចពន្លត់ ទើបបណ្តាលឲ្យឆេះផ្ទះបែបនេះ ។ ដោយឡែក នៅក្នុងហេតុការនេះដែរក៏ធ្វើឲ្យផ្ទះ២ខ្នងផ្សេងទៀតនៅសងខាងផ្ទះឆេះនោះក៏មានការរោលខ្មៅៗមួយចំហៀងផ្ទះផងដែរ តែមិនឆេះនោះទេ ។

សមត្ថកិច្ចប្រាប់ទៀតថា នៅក្នុងហេតុការណ៍នេះ សមត្ថកិច្ចប្រើប្រាស់រថយន្តពន្លត់អគ្គិភ័យប្រចាំការនៅសាលាខណ្ឌដង្កោចំនួន២គ្រឿង  ប៉ុន្តែបាញ់ទឹកអស់តែ១គ្រឿងភ្លើងរលត់ទៅវិញទាំងស្រុង ដោយមិនមានមនុស្សណាម្នាក់ទទួលរងគ្រោះថ្នាក់នោះឡើយ ៕នគរវត្ត

image.png